由掌管家庭生活的月亮星座出發，深入睇下各個星座女係點樣處理家庭生活，呢個先係真面目！
想知自己嘅月亮星座係乜同想知多ｄ，可以去睇睇先：－
http://www.moon.com.cn/star/moon/calculate.htm
http://my-way.ettoday.com/cgi-bin/pt1freecnt?show_form=1&pid=F001&partner=ET
http://tw.astrology.yahoo.com/luckywant/horoscope/form_chart.html
月亮白羊座老婆
無論佢的太陽響邊個星座，只要月亮一落入白羊座，呢個老婆就一定係一家之主，話晒事果位！無論屋企的大小事務上至買樓下至買咩廁紙都一定要由佢話事！你咪睇呢個老婆咁專制，其實響頭家度佢又好有承擔，萬一(touch wood)有起咩事，佢一定唔會退縮一夫當關咁撐起成頭家！
月亮金牛座老婆
呢位非常老婆非常捱得，兩個人柄響一百呎住、日日要拎衫去河邊洗、用臭到爆火水爐煮飯，佢都會一d怨言都冇，不過！對於你的工作同收入佢會好緊張，你要佢捱唔緊要，但佢唔能夠容忍冇錢交租冇錢買衫同冇錢買菜，所以有個萬能老婆照顧，麻煩你都要好好保住份工，唔係？後果嚴重！
月亮雙子座老婆
月亮雙子為人較為獨立，再加上嗜好多多，唔鍾意對死一個人，又唔興管住晒你，所以同佢一齊生活都幾自由，仲有未結婚的感覺添！不過咪開心住，佢份人好鬼神經質兼飄忽，連佢自己都攪唔清楚要d乜，相處落都幾惡頂，再配埋佢份冷漠，有時真係以為好似套經典電影咁-「與敵同眠」！
月亮巨蟹座老婆
講到照顧老公同細路，月亮巨蟹老婆可謂盡心盡力，對老公服侍周到，對仔女就更加無微不至！不過響兩公婆相處方面就有d頭痕，一方面巨蟹老婆好鍾意黐實個老公，去朋友聚會、公司聯誼甚至乎成班麻甩佬飲啤酒睇波都想跟埋去，但另一方面佢又唔鍾意你太過管佢d事，仲有係情緒化！
月亮獅子座老婆
無論響屋企響公司，呢位老婆都係要企響人群最前面，要面子要威，對住老公仔女都係咁話，不過你咪睇佢大大聲成日呢樣果樣，其實佢只係一個任性d又唔肯長大的女仔，佢攪咁多無非都係想大家注意佢多d同錫佢多d！另外心地善良係佢的優點；鍾意亂駛錢係最要留意佢的缺點！
月亮處女座老婆
娶得月亮處女的老婆，你一定要有所覺悟！月亮處女係個好極端的星座，講到照顧屋企佢比月亮金牛同月亮巨蟹更加細心更加盡力；但係講到專橫野蠻亦都比月亮白羊同月亮獅子更加厲害！真係有好有唔好！再加上佢囉嗦同奄尖的性格，有時難免會產生就快畀佢迫到癲的感覺！
月亮天秤座老婆
要數鍾意成日黐住老公的星座老婆，月亮天秤老婆同月亮巨蟹老婆不相伯仲，不過同巨蟹老婆唔同的係，如果老公唔得閒巨蟹老婆最多都係柄埋鬧情緒偷偷落淚，但係天秤老婆就會一洗平日優雅大方的形象會發癲，向住你大吵大鬧！唔想咁樣？只有多d陪下呢位最怕寂寞最依賴的天秤老婆！
月亮天蠍座老婆
月亮天蠍老婆係一等一的女強人，佢的強悍係月亮白羊+月亮獅子咁勁，佢管頭家的能力係月亮巨蟹+月亮處女的混合體，和平的日子佢會柔情似水對你千依百順，不過你稍有桃花的嫌疑，對唔住你呢世都咪駛旨意有好日子過！所以對住呢個絕對佔有慾的老婆，目不斜視係你的座右銘！
月亮人馬座老婆
同月亮獅子老婆一樣，月亮人馬老婆都係一個長唔大的大細路，不過唔同的係佢只係打扮行為拒絕長大，其實佢思想同心志已經熟到爛！自由奔放的佢唔會因為結婚已有好大改變，佢依然會追求有意義的生活方式，千祈咪以為可以用「已為人妻」鎖住佢，佢需要極大的空間屬於自己！
月亮山羊座老婆
響咁多個星座老婆之中，月亮山羊老婆思想係最傳統，嫁雞隨雞跟足你一世不突止，佢亦唔介意日日放工趕返屋企洗米煮飯畀你食，甚至星期日柄響屋企洗衫洗廁所都在所不計；不過你就咪阻止佢出去工作，就算唔係咩豐功偉「職」，佢都好需要一份工作作為精神寄託！
月亮水瓶座老婆
要娶個月亮水瓶的老婆前，你要先撫心自問係一個好叻的人，定係冇乜自尊心的人，點解咁講？事關月亮水瓶老婆未必真係好叻好成功，不過佢自己就會覺得自己係高人一等，你做得好佢當然會拍晒手掌讚你，但一旦有乜依郁佢就難免不停對你單單打打，另外唔鍾意同你溝通係另一難頂位！
月亮雙魚座老婆
優點係月亮雙魚老婆可謂女人中的女人，柔情似水體貼細心，結婚之後佢會全心全意去愛你；缺點係月亮雙魚老婆亦係女人中的女人，婆婆媽媽依賴心強，不切實際，唔多想返工辛苦！所以想娶個月亮雙魚的老婆？你冇返咁上下心力同財力都盞攪！(各位女士請勿見怪，絕無貶低女性的意思！)
No comments:
Post a Comment