星座神話起源之1

信唔信星座？其實某程度上講嘅性格都幾啱咖！！！


白羊座神話
白羊座背後的希臘神話關於兩兄妹，話說國王阿塔馬斯同仙女尼菲爾結婚仲生了小王子佛里克索斯同小公主希莉，可惜好景不常，國王貪新忘舊再娶美若天仙但係蛇蠍心腸的伊諾，尼菲爾一怒之下返外家天庭。後母伊諾成日虐待王子同公主，仲衰到叫國王拎兩兄妹作為天災的祭品獻畀天神宙斯。尼菲爾頂唔順向宙斯求救，宙斯派使者之神漢密斯幫手，漢密斯搵響森林入面出晒名脾氣暴躁的金羊族群其中一隻曉飛天的金色公羊去救人。公羊成功救走兩兄妹跟住一支箭咁逃走，但係妹妹希莉響黑海上空畀雷聲同大浪嚇親仲跌埋落海浸死。哥哥佛里克索斯順利到達艾也特斯國，得到國王的款待，為了答謝國王，佛里克索斯將金公羊作祭品送畀宙斯，金羊毛由戰神阿瑞斯掛響森林由佢隻火龍看住，而呢隻金公羊形象就成為了白羊座。

金牛座神話
來自希臘的起源係由宙斯而起，腓尼基國有一位又靚又可愛的公主歐蘿芭，連天神宙斯都畀佢的美貌吸引。一日歐蘿芭好似平時咁同班朋友響河邊散步，宙斯化身成為一隻強壯又靚仔的純白色公牛出現響佢面前，歐蘿芭中計畀呢隻公牛吸引，情不自禁騎上去，宙斯見機不可失撇甩歐蘿芭班朋友，帶住佢飛越大海到達克里特島。得逞的宙斯變返原形以天神個款向歐蘿芭示愛，歐蘿芭敵唔過面前呢位神的英俊外貌同甜言蜜語，結果同佢生了三個仔：米諾斯、沙柏頓同拉達曼堤斯，至於果個金牛的形象就成為了金牛座。

雙子座神話
雙子座的神話圍繞住兩兄弟，話說厄多里國王個女麗坦生得又靚又出眾，深深吸引住宙斯，就算麗坦已經許配畀狄達尼奧斯，宙斯仍然響洞房夜偷偷變成一隻天鵝向佢示愛，結果麗坦生了兩隻大蛋，一隻孵出繼承宙斯神血統的海倫同波呂克斯；而另一隻就孵出繼承了狄達尼奧斯人類血統的克麗泰梅絲特同卡斯托爾。使者之神漢密斯將兩兄弟送去派力恩度接受教育。兩兄弟一邊學習一邊參與多項唔同的任務，例如傑森的金羊毛之旅咁。兩兄弟出生入死感情非常之好，後來佢兩個畀堂兄弟殺死，宙斯將擁有神性的波呂克斯帶去奧林匹克生活，而身為人類的卡斯托爾就要到冥府生活。兩兄弟唔多願意分開，宙斯見係咁就成全呢個心願，等佢兩兄弟一半時間響天庭，另一半時間就響冥府，而兩兄弟的形象就化成星星升到天上面，成為了雙子座。

巨蟹座神話
巨蟹座的起源神話較其他星座簡單，大英雄海格力斯畀天后希拉用詭計迷惑殺死自己的老婆同仔女，為了贖罪佢要為歐里修斯王完成十項任命。第２項任務係殺死多頭水蛇海德拉，海德拉體形龐大而且就算斬甩個頭又會即刻生返個新的，面對咁勁的敵人連海格力斯都身陷險境，呢個時候希拉仲驚佢唔死，搵埋隻巨蟹來協助海德拉對付佢，雖然巨蟹用鉗夾住海格力斯令佢郁唔到，但最後仍反畀佢踩扁，壯烈犧牲。希拉為了報答蟹的忠誠同犧牲，就將呢隻巨蟹的形象放上天成為巨蟹座。